‘अ‍ॅड. आंबेडकरांच्या भाजपबरोबर वाटाघाटी झाल्या आहेत’ असं म्हणणं तर्कदृष्ट्या पटत नाही!

सध्या लोकसभा निवडणुकांची रणधुमाळी चालू आहे. त्यातील तीन टप्पे पूर्ण झाले असून बाकी टप्पे मे महिन्याच्या मध्यापर्यंत संपणार आहेत. मतदारांना आकर्षित करण्यासाठी ठिकठिकाणी सभांचे आयोजन, इलेक्ट्रॉनिक माध्यमांतून मुलाखती तर मुद्रित माध्यमांतून लिखाण केले जात आहे. यातून निवडणुकातील विविध पक्ष, युत्या, आघाड्या एकमेकांवर आरोप-प्रत्यारोप करत आहेत. त्यातील सत्य-असत्य काय ते जनतेला ठरवावे लागते. बऱ्याचदा त्यांची दिशाभूलही होऊ शकते. अशापैकीच महाराष्ट्रातील वंचित बहुजन आघाडीचे नेते अ‍ॅड. प्रकाश तथा बाळासाहेब आंबेडकर यांच्यावर केला जाणारा ‘त्यांनी काँग्रेसला पराभूत करण्यासाठी भाजपशी डिलिंग केले आहे’ हा आरोप. या मूळ सूत्राला धरून जे ते कार्यकर्ते, राजकीय विरोधक, तथाकथित विचारवंत आपापल्या समजाप्रमाणे याबाबतच्या अफवा पसरवत आहेत. ज्यांची पोहोच वरील माध्यमांपर्यंत आहे, ते त्यामार्फत, तर उरलेले गप्पागोष्टींच्या स्वरूपात, काहीजण कुजबुजीच्या स्वरूपात तसा अपप्रचार करत आहेत.

वाईट याचे वाटते की, यात डाव्या, पुरोगामी, आंबेडकरवादी मित्रपरिवारातील काही कार्यकर्ते व त्यांची मुले यांचाही समावेश होतो. यातून त्यांचा अ‍ॅड. आंबेडकर यांच्याकडे पाहण्याचा तुच्छतेचा दृष्टिकोन स्पष्टपणे जाणवतो. यातही आश्चर्य म्हणजे ते ज्यांचे चाहते असतात, ते भ्रष्टाचारात आकंठ बुडालेले असतात, याची त्यांना माहिती असते. पण त्याच्याशी यांना काहीच सोयरसुतक नसते. किंबहुना भ्रष्टाचार करणे हा त्यांचा हक्कच आहे असे ते मानतात. काही जण अ‍ॅड. आंबेडकरांवर विविध तर्काच्या आधारे ‘डिलिंग अथवा संगनमत, साटेलोटे’ असल्याचे सूचित करत असतात, तर काही जण सरळ तसा आरोप करतात. त्याची दोन उदाहरणे पाहू.

महाराष्ट्र प्रदेश काँग्रेसचे अध्यक्ष अशोक चव्हाण यांनी ‘बीबीसी मराठी’ला दिलेल्या मुलाखतीत अ‍ॅड. आंबेडकरांबद्दल बोलताना ‘भाजपशी बहुतेक त्यांची बोलणी झाली असावी. मुख्यमंत्र्यांशी संगनमतानं त्यांचं काही तरी ठरलं असावं, असा माझा स्पष्ट आरोप आहे. आमचं नुकसान करण्यासाठीच त्यांनी उमेदवार उभे केले आहेत,’ असं म्हटलं आहे.

.............................................................................................................................................

या पुस्तकाच्या ऑनलाईन खरेदीसाठी क्लिक करा -

https://www.booksnama.com/book/4810/Shivputra-Chhatrapti-Rajaram

.............................................................................................................................................

काँग्रेसचे राज्यसभेतील खासदार, नामवंत पत्रकार, अनेक वृत्तपत्रांचे संपादक राहिलेले, जागतिकीकरणाच्या धोरणाचे खंदे समर्थक व एक विचारवंत म्हणून ज्यांना मान्यता आहे, अशा कुमार केतकरांनी ‘टीव्ही 9’च्या ‘न्यूजरूम स्ट्राईक’ला दिलेल्या मुलाखतीत म्हटलं आहे की, ‘अ‍ॅड. प्रकाश आंबेडकरांच्या लोकप्रियतेबद्दल संशय नाही. संशय किंवा प्रश्न हा त्यांच्या भूमिकेबद्दल आहे. त्यांनी अजून आपला शत्रू निश्चित केलेला नाही. त्यांनी तो निश्चित केला पाहिजे. आपण जे पाऊल उचलतो आहोत, त्याचा नक्की फायदा कोणाला होणार आहे? त्याचा फायदा भाजपला होणार आहे की, काँग्रेसला की अन्य कोणाला?’

राज ठाकरे यांनी ज्याप्रमाणे मोदी आणि अमित शहा यांना टार्गेट केलं आहे, तसं अ‍ॅड. आंबेडकरांनी केलं नाही. त्यांनी आपली भूमिका मोघम ठेवली आहे. त्यांनी उभ्या केलेल्या उमेदवारांचा फायदा जर भाजपला झाला तर ती भाजपाची ‘बी टीम’ आहे की नाही, हे त्यांनी व लोकांनी ठरवायचं आहे. ‘अ‍ॅड. आंबेडकरांच्या खाजगीतल्या वाटाघाटी या भाजपबरोबर किंवा अमित शहाबरोबर झाल्या आहेत’ असंही विधान केतकरांनी या मुलाखतीत केलं आहे. यासाठी त्यांनी बी.जी. कोळसे पाटलांची उमेदवारी मागे घेण्याच्या वेळेस त्यांनी काढलेल्या पत्रकाचा उल्लेख केला आहे.

केतकरांच्या वरील विधानाची सत्यता पडताळण्यासाठी मी बी.जी. कोळसे पाटलांच्या यू-ट्यूबवरील मुलाखती पाहिल्या आणि फेसबुकवरील त्यांच्या पोस्टही तपासल्या. मला कोठेही त्यांचं तसं विधान अथवा लिखाण सापडलं नाही. उलट अ‍ॅड. आंबेडकरांशी चांगले संबंध असून त्यांच्याशी मैत्री कायम राहील असंच त्यांनी सांगितलं आहे. म्हणून खुद्द कोळसे पाटलांनाच याबाबत फोन लावून विचारणा केली असता, ‘असा कोणताही आरोप व असलं कोणतंही विधान मी कोठेही केलं नसल्याचं’ त्यांनी सांगितलं. आणि ‘टी.व्ही. 9’ची मुलाखत त्यांनी माझ्याकडून मागवून घेतली.

अशा प्रकारे काँग्रेसच्या पदाधिकाऱ्यांकडून, त्यांच्या लाभार्थ्यांकडून व काही चाहत्यांकडूनही मुद्दामून अशा अफवा पसरवल्या जात आहेत. प्रसारमाध्यमांत त्यांचं काही खास स्थान असल्यानं त्यांना तशी प्रसिद्धीही मिळते. पण अशा बाबींचा ते कोणताही पुरावा देऊ शकत नाहीत. किंबहुना अशा बाबींचा काही पुरावा असतो काय, असंही ते म्हणू शकतात. तेव्हा ते आपला मुद्दा तर्काच्या आधारे सिद्ध करण्याचा प्रयत्न करत असतात. मग यातील तर्क काय? ‘ज्या अर्थी अ‍ॅड. आंबेडकर यांच्यामुळे काँग्रेसचं नुकसान होऊ शकतं, त्याअर्थी भाजपनं त्यांच्याशी डिल केलं आहे,’ असा साधा सोपा अर्थ ते काढतात. त्यांच्या मते ‘काँग्रेस हा मोठा पक्ष आहे. तोच भाजपशी मुकाबला करू शकतो. म्हणून त्याच पक्षाला मदत केली पाहिजे’ हा एक मोठ्या प्रमाणातील ‘विचार’ म्हणून आपण त्याचा आदर करू शकतो. तसाच आदर त्यांनी काँग्रेसबद्दलच्या इतरांच्या विचाराचा केला पाहिजे. ‘काँग्रेस विरोध म्हणजे भाजपकडून डिलिंग’ एवढंच सूत्र मांडणं हे संविधानानं दिलेल्या विचारस्वातंत्र्यालासुद्धा मारक आहे. निदान केतकरांसारख्या विचारवंताकडून तशी अपेक्षा नाही.

खरं म्हणजे त्यांच्यासारखा विचारवंत असाही तर्क करू शकतो -

१) या निवडणुकांच्या पूर्वी २०१४ नंतर अ‍ॅड. आंबेडकर यांनी राज्यभर जातीअंताच्या परिषदा घेतल्या आहेत. त्यातून त्यांनी भाजपची मातृसंघटना असलेला रा.स्व. संघ, त्याचे प्रमुख मोहन भागवत यांच्या विचार व्यवहारावर कडाडून हल्ले केले आहेत. संघाला भारतीय संविधान रद्द करून ‘मनुस्मृती’वर आधारित वेगळं संविधान लागू करायचं आहे, असं विधान त्यांनी अहमदनगर येथील जातीअंताच्या परिषदेत केलं आहे. तिथंच त्यांनी मोहन भागवतांशी याबाबत जाहीर वादविवाद करण्याचं आवाहन केलं आहे. नागपूर येथील त्यांच्या संघ कार्यालयावर मोर्चे काढले आहेत.

२) त्यालाच वैतागून संघाच्या कटकारस्थानानं रत्नाकर गायकवाड यांना हाताशी धरून मुंबई येथील आंबेडकर भवन पाडण्यात आलं. तेथील प्रबुद्ध भारत प्रेस, अ‍ॅड. आंबेडकरांची कार्यालयं जमीनदोस्त करण्यात आली.

३) ३१ डिसेंबर २०१८ च्या पुणे येथील एल्गार परिषदेचे अ‍ॅड. आंबेडकर अध्यक्ष होते. १ जानेवारी २०१९ रोजी झालेल्या दलितांवरील हल्ल्याला एल्गार परिषद व त्याचे अध्यक्ष अ‍ॅड. आंबेडकर यांनाच जबाबदार धरण्याचा भाजप सरकारचा प्रयत्न आहे. त्यासाठी नेमलेल्या आयोगातील मी एक साक्षीदार असल्यानं सरकार, पोलीस खाते व सरकारच्या पोशिंद्या असलेल्या एनजीओ संघटनांच्या वकिलांचा सर्व रोख अ‍ॅड. आंबेडकर यांच्यावरच आहे, हे मी खात्रीनं सांगू शकतो.

४) अ‍ॅड. आंबेडकर हे नक्षलवादी आहेत, असा त्यांच्यावर पुणे पोलिसाकडून आरोप केला गेला. पंतप्रधान मोदींना मारण्याच्या कटात ते सामील होते, असं पत्र टीव्ही चॅनलवर ‘गोदी मीडिया’नं झळकवलं आहे.

५) त्यांचे मेव्हणे आनंद तेलतुंबडे यांच्या घरावर पोलिसांनी धाडी घातल्या. त्यांच्यावरही वरील कटात सामील असल्याचा, युएपीए कलमाखालील देशद्रोहाचा गुन्हा दाखल केला असून सध्या ते जामिनावर बाहेर आहेत. कोणत्याही क्षणी त्यांची रवानगी तुरुंगात होऊ शकते.

६) एके 47 सारखी केवळ सैन्यदलाकडे असणारी शस्त्रास्त्रं विनापरवानगी संघाकडे कशी असू शकतात? त्यांची ते पूजाअर्चा करून, मिरवणुका कशा काय काढू शकतात? असे प्रश्न केवळ अ‍ॅड. आंबेडकर यांनीच उपस्थित केले आहेत. दसऱ्याच्या दिवशी याविरोधी ते दरवर्षी मोर्चे काढून, निदर्शनं करून संघाला आव्हान देत असतात. 

७) संघाला संवैधानिक चौकटीत आणा अशी मागणी फक्त त्यांनीच लावून धरली आहे.

८) याशिवाय भाजपच्या आर्थिक धोरणावर, संघाच्या सामाजिक व्यवहारावर कशाचीही पर्वा न करता तर्कशुद्ध टीका ते स्वत: जाहीर सभांतून करत असतात. त्यात ‘आम्ही सत्तेत आल्यास मनोहर भिडे, मोहन भागवत यांना तुरुंगात टाकू’ असा इशाराही ते देत असतात.

९) अशा प्रकारे भाजप, संघावर जोरदार हल्ला फक्त अ‍ॅड. आंबेडकर हेच करत आहेत. दुसरं नाव घ्यायचं झाल्यास कन्हैय्याकुमारचं घेता येईल. बाकी त्यांच्यानंतर.

या सर्व बाबी जगजाहीर असतानाही भाजपला मदत करण्यासाठी ‘अ‍ॅड. आंबेडकरांच्या खाजगीतल्या वाटाघाटी या भाजपबरोबर किंवा अमित शहाबरोबर झाल्या आहेत’ असं म्हणणं प्रत्यक्ष पुरावा तर सोडाच, पण तर्कदृष्ट्याही पटत नाही. तेव्हा निदान विचारवंतांनी तरी विचार करून आपले विचार मांडावेत एवढीच माफक अपेक्षा.

.............................................................................................................................................

लेखक कॉ. भीमराव बनसोड मार्क्सवादी कार्यकर्ते आहेत.

bhimraobansod@gmail.com

.............................................................................................................................................

Copyright www.aksharnama.com 2017. सदर लेख अथवा लेखातील कुठल्याही भागाचे छापील, इलेक्ट्रॉनिक माध्यमात परवानगीशिवाय पुनर्मुद्रण करण्यास सक्त मनाई आहे. याचे उल्लंघन करणाऱ्यांवर कायदेशीर कारवाई करण्यात येईल. 

.............................................................................................................................................

‘अक्षरनामा’ला आर्थिक मदत करण्यासाठी क्लिक करा -

.............................................................................................................................................